Яндекс.Метрика

 

16 студзеня 2020 года

   Традыцыйная калядная сустрэча літаратараў Уздзеншчыны і Дзяржыншчыны адбылася ў Дзяржынскай цэнтральнай раённай бібліятэцы напярэдадні праваслаўнага свята Вадохрышча. Удзельнікі літаратурнага аб’яднання “Нёманец” і народнага літаратурнага клуба “Выток” каля елкі сустрэліся з Дзедам Марозам і Снягуркай. А потым разам з імі апынуліся ў свеце тэатра: удзельнікі гуртка Вялікасельскага Дома народнай творчасці прадставілі батлеечны спектакль “Цар Ірад”. Станоўчыя ўражанні і захапленне ад вечнага сюжэту натхнілі прысутных на абмеркаванне тэмы духоўнага свету чалавека і захавання традыцый.

       Таксама падчас мерапрыемства гучалі і шчырыя ўспаміны з дзяцінства, і сумаванне па снезе, і філасофскі роздум пра жыццё, і жарты – таленавітым паэтам падуласны ўсе формы і тэмы!

Госці з Уздзеншчыны – Паліна Кучук, Галіна Нічыпаровіч і Валянціна Шытыка – падарылі чытачам бібліятэкі свае кнігі з аўтографамі.

         Музычныя падарункі прагучалі ў выкананні Тамары Кашчэва і Вольгі Бокуць-Чабатаровай.

Некалькі гадзін сустрэчы праляцелі ў адно імгненне і пакінулі ў сэрцах прысутных цудоўны настрой і натхненне!

                                                                                 http://dzerlib.by

gallery/img_3900

17 студзеня 2020 года

 

       З літаратарамі Уздзеншчыны сустрэлася рэдактар аддзела літаратурна-мастацкіх праграм Першага нацыянальнага канала Беларускага радыё Маргарыта Прохар. На сустрэчу ў раённую бібліятэку завіталі аўтары, удзельнікі літаратурнага аб’яднання “Нёманец” Т. Каляда, В. Лукашэвіч, Д. Вінаградаў, Г. Нічыпаровіч, В. Бокуць-Чабатарова, В. Шытыка. Яны падзяліліся сваімі творчымі планамі, расказалі аб сваіх літаратурных набытках, зрабілі запісы для эфіру радыёперадачы “Літаратурны калейдаскоп”.

11 лютага 2020 года

 

   Цікавую сустрэчу з нагоды юбілею пісьменніцы Галіны Нічыпаровіч падарыла наведвальнікам раённай бібліятэкі свята паэзіі і прозы “Каб добры след пакінуць на зямлі”.

   Шмат цёплых слоў, сяброўскіх прывітанняў прагучала ў гэты дзень у адрас юбіляркі. Цёплымі, шчырымі былі выступленні дырэктара бібліятэкі А. Драчан, старшыні абласнога аддзялення Саюза пісьменнікаў Беларусі С. Быкавай, кіраўніка абласнога народнага клуба кампазітараў і паэтаў “Жывіца” І. Карнаухавай. Сяброўскія прывітанні прагучалі ад удзельнікаў літаратурнага аб’яднання “Нёманец”, з якім Галіну Нічыпаровіч звязвае 20 год творчай дзейнасці.

    На вечарыне гучалі песні ў выкананні артыстаў раённага Дома культуры. Увазе прысутных была прапанавана мультымедыйная прэзентацыя, прысвечаная Г. Нічыпаровіч. Супрацоўнікі дзіцячай бібліятэкі падрыхтавалі невялікую лялечную імпрэзу па матывах апавядання аўтара.

  Павіншавала Галіну Міхайлаўну старшыня Уздзенскай раённай арганізацыі ветэранаў Т. Лычкоўская. На працягу свята гучалі вершы, гумарэскі аўтара ў выкананні супрацоўнікаў бібліятэкі.

 

20 сакавіка 2020 года

 

   Напярэдадні Сусветнага дня паэзіі сабраліся члены літаратурнага аб’яднання “Нёманец”, каб у чарговы раз далучыцца да цудоўных імгненняў асалоды ад знаёмства з узнёслымі паэтычнымі, лірычнымі і патрыятычнымі, сатырычнымі і філасафічнымі радкамі.

  Сваім бачаннем паэзіі, шляхамі далучэння да вершаскладання, апошнімі літаратурнымі дасягненнямі падзяліліся члены Мінскага абласнога аддзялення Саюза пісьменнікаў Беларусі Г. Нічыпаровіч і В. Сабалеўскі. В. Бокуць-Чабатарова падрыхтавала папку з вершаванымі радкамі і ўспамінамі пра свайго бацьку, удзельніка Вялікай Айчыннай вайны. Тамара Каляда, працытаваўшы творы Максіма Танка, Святланы Быкавай і Ірыны Карнавухавай, знайшла да іх і адпаведныя ўласныя радкі. Валянціна Шытыка больш вядомая як празаік, але і ў яе творчым арсенале знайшліся цікавыя вершаваныя радкі.

                                                                                                    Віктар Сабалеўскі