2 мая 2019 года
2 мая ў чытальнай зале цэнтральнай раённай бібліятэкі адбыўся вечар памяці протаіерэя Міхаіла Навіцкага, чый лёс цесна звязаны з гісторыяй Уздзеншчыны. Ён служыў Богу і людзям, нягледзячы на ганенні і цяжкасці. Айцец Міхаіл Навіцкі не адрокся ад праваслаўнай веры, а быў дарадчыкам для ўсіх веруючых і здзейсніў духоўны подзвіг, прыняўшы пакутніцкую смерць.
На вечарыне гучалі вершы, духоўная музыка П. Чайкоўскага, песні праваслаўнай тэматыкі. Для ўдзельнікаў вечарыны была падрыхтавана мультымедыйная прэзентацыя аб жыцці айца Міхаіла. Пранікнёна і цікава прагучалі выступленні гасцей - настаяцеля храма Святых апосталаў Пятра і Паўла протаіерэя Грыгорыя Чарапеннікава і настаўніка гісторыі СШ №2 ім К. Крапівы, даследчыка А.М. Ярмольчыка.
3 мая 2019 года
Чарговая сустрэча ўдзельнікаў клуба "Залаты ўзрост", які дзейнічае пры бібліятэцы, адбылася напярэдадні вялікага свята Перамогі, 3 мая. Удзельнікі клуба прынялі віншаванні ад супрацоўнікаў бібліятэкі, а затым дзяліліся ўспамінамі аб цяжкіх гадах ваеннага ліхалецця. Песні ваенных гадоў дарыла прысутным удзельніца хору "Надзея" Н. Шамянкова.
9 мая 2019 года
Супрацоўнікі раённай бібліятэкі і актыўныя ўдзельнікі літаб’яднання “Нёманец” у складзе дэлегацыі Уздзенскага раёна прынялі ўдзел у абласным свяце, прысвечаным 74-гадавіне Перамогі ў Вялікай Айчыннай вайне. Урачыстым маршам па цэнтральным праспекце горада Жодзіна ўпершыню прайшла калона журналістаў, пісьменнікаў, бібліятэкараў. У пачатку гэтай калоны “рухалася” разгорнутая кніга саліднага памеру. З гонарам і высокай патрыятычнай свядомасцю крочылі актывісты грамадства, трымаючы ў руках сімвалічныя бутафорскія пер’і, а таксама фотаработы У.С. Цыдзіка.
14 мая 2019 года
Напярэдадні Дня сям'і у цэнтральнай бібліятэцы адбылося чарговае пасяджэнне клуба "Мая сям'я". Мамы, якія выхоўваюць прыёмных дзяцей прымалі віншаванні ад работнікаў бібліятэкі, вядучага спецыяліста сектара аховы дзяцінства аддзела адукацыі і турызму райвыканкама Наталлі Герман. Жанчыны абмяркоўвалі розныя пытанні выхавання, дзяліліся інфармацыяй, дасягненнямі і праблемамі ў выхаванні дзяцей.
