6 лістапада 2020 года
У рамках акцыі “Жаданы госць”, у літаратурнай гасцёўні адбылася сустрэча-знаёмства з мінскім мастаком Сяргеем Махначом.
У пачатку сустрэчы ён падараваў раённай бібліятэцы кнігі аб сваім дзядулі, навукоўцы Аляксандры Махначы, ураджэнца в. Хатляны Уздзенскага раёна,падзяліўся ўспамінамі пра дзядулю, расказаў пра сябе, пра свае карціны і творчыя планы.
20 лістапада 2020 года
Збор краязнаўчых календароў, якія ўжо 13 гадоў выдае нястомны краявед А.І.Нікітка, папоўніўся новым выданнем. На гэты раз Аляксандр Іванавіч зацікавіўся жыццём і дзейнасцю аднаго з законанастаўнікаў і тлумачоў торы Мошэ Файнштэйна, які нарадзіўся і вырас у мястэчку Узда, быў рабінам Узды і Любані. Не вытрымаўшы перадваенных ганенняў на габрэяў, Мошэ Файнштэйн эміграваў у ЗША, дзе за палову стагоддзя набыў статус самага аўтарытэтнага законанастаўніка юдаізму. Памёр у Нью-Ёрку у 1986 годзе, пахаваны на Святой Зямлі ў Іерусаліме.
Слухаючы эмацыянальны аповед Аляксандра Іванавіча пра свой краязнаўчы вышук, удзельнікі прэзентацыі, якая адбылася 20 лістапада ў гасцёўні цэнтральнай раённай бібліятэкі імя П. Труса, зноў з гонарам канстатавалі: зямля Уздзеншчыны падарыла міру шмат таленавітых людзей і наша задача – захаваць памяць пра іх.
