8 жніўня 2019 года
У цэнтральнай раённай бібліятэцы адбылася прэзентацыя кнігі маладога аўтара Ліндо Рандзір "Мой павший город". Гледачам быў прапанаваны міні-спектакль па вершах паэткі ў яе ж выкананні, які суправаджала мультымедыйная прэзентацыя. А потым удзельнікі мерапрыемства выказвалі свае думкі, дзяліліся ўражаннямі аб кнізе, жадалі аўтару далейшага творчага плёну.
15 жніўня 2019 года
Ва Уздзенскай цэнтральнай раённай бібліятэцы імя П. Труса адбылося чарговае пасяджэнне членаў літаратурнага аб’яднання “Нёманец”. Адной з асноўных тэм гэтай сустрэчы літаратараў стала ўшанаванне пераможцаў раённага творчага конкурсу “Сучаснае пакаленне ведае цану вызвалення”, прымеркаванага да 75-й гадавіны вызвалення Беларусі ад фашысцкіх захопнікаў.
Арганізатарамі конкурсу сталі рэдакцыя раённай газеты “Чырвоная зорка”, бібліятэка, мясцовае літаб’яднанне і раённая арганізацыя грамадскага аб’яднання “Белая Русь”. На працягу амаль паўгода на старонках газеты друкаваліся творы вопытных ужо літаратараў і маладзейшых аўтараў, у якіх расказвалася пра бессмяротны подзвіг беларускага народа ў гады ваеннага ліхалецця. Вялікая Айчынная тым ці іншым чынам закранула амаль кожную сям’ю, у многіх з прысутных у той дзень у зале 75-80 гадоў таму загінуў ці выцярпеў неймаверныя мукі хтосьці з родных, блізкіх.
Запамінальныя вершаваныя вобразы стварылі таксама ў сваіх творах член Саюза пісьменнікаў Беларусі Галіна Нічыпаровіч, жыхарка вёскі Мякаты Іна Алісевіч, былая бібліятэкарка Клаўдзія Рогава, жыхарка райцэнтра Тамара Каляда, іншыя аўтары.
Павіншаваць пераможцаў конкурсу прыйшлі старшыня раённай арганізацыі “Белая Русь” Алена Герасімовіч і прадстаўніца грамадскага аб’яднання Ірына Траццяк. Дыпломам першай ступені за перамогу ў конкурсе ўзнагароджана Ала Шыбко з вёскі Цялякава. Другое месца прысуджана супрацоўніку “Чырвонай зоркі” Віктару Сабалеўскаму, а трэцяе падзялілі Тамара Каляда і Вольга Бокуць-Чабатарова.
Не ўпершыню завітала на Уздзеншчыну пісьменніца, аўтар шматлікіх кніг для дзяцей і дарослых, песень, кіраўнік абласнога народнага клуба кампазітараў і паэтаў “Жывіца” Ірына Карнаухава. У цёплай сяброўскай атмасферы яна расказала пра свае апошнія творчыя сустрэчы, дасягненні, падзялілася планамі. Уважліва слухалі ўдзельнікі мерапрыемства і творцаў з “Нёманца” – Валянціну Шытыка, Дзмітрыя Вінаградава, Галіну Нічыпаровіч, Паліну Кучук, дырэктара бібліятэкі Аксану Драчан.
Віктар Сабалеўскі
22 жніўня 2019 года
Літаратурная гадзіна да 125-годдзя з дня нараджэння М. Зошчанкі сабрала ў літаратурнай гасцёўні сяброў бібліятэкі. Шмат цікавага прапанавалі бібліятэкары аматарам літаратуры, якія завіталі на мерапрыемства: цікавыя матэрыялы з біяграфіі пісьменніка, архіўныя фотаздымкі, урыўкі з мастацкай стужкі па апавяданнях М. Зошчанкі “Не может быть”, апавяданні М. Зошчанкі ў выкананні акцёраў А. Філіпенкі, М. Трафімава. На працягу сустрэчы гучала музыка 20-30-х гадоў мінулага стагоддзя.
Напрыканцы бібліятэкары чытальнай залы чыталі апавяданні “Аристократка”, “Баня”, “История болезни”, “Качество продукции”.
